Opisial a linuktan ti baro a County of Maui Recovery Permit Center dagiti ruanganna ita nga aldaw idiay Kahului, a mangipaay iti napateg a rekurso para kadagidiay agsapsapul a mangbangon manen kadagiti lugar a naapektaran iti uram idiay Lahaina ken Kula bayat ti panaglayagda iti proseso ti panangipalubos ken panangaramidda iti sumaruno nga addang nga agturong iti pagtaenganda.

Masarakan ti sentro iti County of Maui Service Center, 110 Alaihi St., Suite 207, ken silulukat manipud Lunes agingga iti Biernes, alas 8 ti bigat agingga alas 4 ti malem Adda dagiti pannakabagi manipud iti 4LEAF Inc. tapno sungbatanda ti aniaman a saludsod dagiti residente maipapan iti naurnos a proseso ti panangipalubos iti emerhensia.

“Daytoy ket sabali pay a milestone para iti komunidadtayo tapno makasubli kadagiti sanikua, ken dayta ti maipapan iti daytoy, dayta ti idurduronmi, ket tapno makasubli dagiti tattao iti loteda,” kinuna ni Mayor Richard Bissen idi Lunes iti baro a sentro. “Paregtaenmi dagiti tattao a mangisubmitir kadagiti kiddawda tapno maakomodarmi ida, para man dayta iti temporario wenno permanente nga estruktura.”

Dagidiay kayatda ti ag-file babaen ti emergency permitting portal ket makasarak kadagiti link iti espesipiko nga aplikasionda – a maawagan iti DSA Disaster Recovery Building Permit – iti https://mapps.mauicounty.gov/DSA-DRBP . Maysa nga aplikasion ket para kadagiti pagtaengan ti maymaysa a pamilia, dagiti aksesoria a pagtaengan ken dagiti aksesoria nga estruktura, ken ti sabali ket para kadagiti adu a pamilia, negosio, komersial, industrial ken dadduma pay a saan a pagtaengan nga estruktura.

Bayat nga agserbi ti sentro ti Kahului a kas ti kangrunaan a sentro a pakaprosesoan dagiti permiso, ti opisina ti satellite ket adda iti proseso ti pannakaipasdek idiay Lahaina Gateway Center.

“Namnamaenmi a maipangato ti physical center idiay Lahaina iti mabiit,” kinuna ni Mayor Bissen. “Iti agdama, addaantayo iti sentro ti Kahului, ket paregtaek met dagiti tattao nga agaplikar online ken tumawag iti permit center.

Para iti impormasion maipapan iti Recovery Permit Center, tawagan ti (808) 270-5724 wenno bisitaen ti https://mapps.mauicounty.gov/DSA-DRBP . Para iti ad-adu pay nga impormasion maipapan kadagiti rekurso ti balay, bisitaen ti https://www.mauirecovers.org/housing .